***පූජ්ය නාවලපිටියේ අරියවංශ ස්වාමීන් වහන්සේ***
෴෴෴෴෴෴෴෴෴෴෴෴෴෴෴෴෴෴෴
බුදුරජාණන් වහන්සේ අපට කියා දෙනවා මෙහෙම හිතන්න කියල. ''මම වයසට යන කෙනෙක්, ඒ වයසට යන ස්වභාවය ඉක්මවල නෑ'' කියල, නිතර බහුල වශයෙන් හිතන්න කියල. ඒ වගේම තමයි ''මම ලෙඩවෙන කෙනෙක්. ඒ ලෙඩවෙන ස්වභාවය ඉක්මවල නෑ'' කියල නිතර බහුල වශයෙන් හිතන්න කියල.
ඒ වගේම ''මම මරණයට පත්වෙන කෙනෙක්. ඒ ස්වභාවය ඉක්මවල නෑ'' කියල නිතර බහුල වශයෙන් හිතන්න කියල, අපට කියාදීල තියෙනවා. ඉතින් අපි ඒ ධර්මයන් හිතින් පුරුදු කරමින් වාසය කළොත් අපිට හිත හදාගන්න පුළුවන් වෙනවා ඒ දේවල් අපේ ජීවිතයට උද්ගත වෙනකොට.
දැන් අපි ලෙඩවෙන කෙනෙක් ඒ ලෙඩවෙන ස්වභාවය ඉක්මවල නෑ කියල හිත පුරුදු කරනවා කියල හිතන්න. යම් දවසක අපි ලෙඩ වෙනවා. එතකොට අපි ඒ ලෙඩේ නිසා කම්පා වෙලා යයිද? කම්පා වෙන්නෙ නෑ. එයා සංවේගයට පත්වෙනවා මිසක කම්පාවෙලා යන්නෙ නෑ, තැවෙන්නෙ නෑ. ආන්න ඒ විධියට අපි හිත හදා ගන්න ඕන.
ඒ වගේම තමයි වයසට යනකොට, අපි එන්න එන්න මොහොතින් මොහොත වයස කරා නේද යන්නෙ? එන්න එන්න කෙස් ටික පැහිල යනවා. දත් ටික දිරල යනවා. මේවා සිද්ධ වෙනවා. මේවා වලකින්නෙ නෑ. මේවා මොහොතින් මොහොත සිද්ධ වෙන ඒවා. ඉතින් අපි දැන්මම අපේ හිත පුරුදු කරන්න ඕන ''මම වයසට යන කෙනෙක් ඒ වගේම වයසට යන ස්වභාවය ඉක්මවල නෑ'' කියන කාරණාව හිතේ පුරුදු කරන්න ඕන.
එහෙම නැති උනොත් එහෙම, අපි මොහොතින් මොහොත වයසට යනකොට, අපේ ශරීරය දිරන්න පටන් අරගෙන ටික ටික දිරල යනකොට, අපි හිත හදාගෙන තිබුණෙ නැත්නම්, ඒ තත්වයට අපිට මුහුණ දෙන්න බැරි වෙලා යනවා. එදාට කම්පා වේවි. දුක් වේවි. පසුතැවීම ඇති වේවි. උහුල ගන්න බැරි වේවි. ඒ නිසා අපි අන්න ඒ තත්ත්වයට මුහුණ දෙන්න තමයි දැන්ම ඉඳන් සූදානම් වෙන්න ඕන.
ඒක පහු කරල පුළුවන්ද? දැන් ඒ විධියට හිත හදාගන්න පහුවෙලා පුළුවන්ද? පහු කරල බෑ. හෙට බැරියැ කියල ඉන්න පුළුවන්ද? බෑ ඒක අද අද මේ මොහොතේ ඉඳන් කරන්න ඕන.
ඒ නිසා ''මම වයසට යන කෙනෙක්. ඒ වයසට යන ස්වභාවය ඉක්මවල නෑ'' කියල නිතර බහුල වශයෙන් හිතන්න . ඒ වගේම තමයි ''මම ලෙඩවෙන කෙනෙක්. ඒ ලෙඩවෙන ස්වභාවය ඉක්මවල නෑ'' කියල නිතර බහුල වශයෙන් හිතන්න . ඒ වගේම ''මම මරණයට පත්වෙන කෙනෙක්. ඒ මරණයට පත්වෙන ස්වභාවය ඉක්මවල නෑ'' කියල නිතර බහුල වශයෙන් හිතන්න.
සියලු දෙනාටම තෙරුවන් සරණයි!
